A Olimpíada é unha iniciativa que se propón o fomento e a defensa da filosofía nestes tempos en que tan minguada se está vendo, tempos nos que as novas leis educativas tenden cara a vías dominadas por unha estreita razón instrumental sen deixar apenas lugar para o pensamento crítico.

​Os obxectivos da Olimpíada 

• Achegar a filosofía á realidade do alumnado, e aumentar así a súa presenza dentro do ámbito escolar,  amosando a súa necesidade e función dentro da nosa sociedade.
• Potenciar a reflexión e o pensamento crítico, traballando as competencias básicas, fundamentalmente o tratamento da información e competencia dixital, a competencia  en comunicación lingüística, a social e cidadá, a cultural e artística, así como a capacidade de aprender a aprender, e a potenciación da autonomía e a iniciativa persoal.
• Complementar os aspectos básicos de traballo dos contidos esenciais do currículo, analizando textos, comprendéndoos e comentándoos, así como producindo outros a partir deles e dos seus contidos temáticos ou problemáticos. 

• Establecer redes, mediante a organización e celebración anual desta Olimpíada, que permitan a interacción entre todo o profesorado de filosofía de Galicia, e ao mesmo tempo entre a ensinanza superior e a ensinanza secundaria. Vincular esas redes coas xa formadas en todo o Estado arredor da Olimpíada Estatal.
• Servir de ponte de información para a difusión dos estudos de filosofía na Universidade.
• Dar visibilidade á reflexión filosófica nas Facultades de Filosofía, en tanto autoridade de referencia cientificamente cualificada, e promover a extensión desa reflexión a toda a sociedade.

Por todo isto, solicitamos o esforzo común de todos os docentes de filosofía, de todos os niveis educativos, para acolleren a autoría e responsabilidade desta actividade e conseguiren levala a bo porto.
A actividade conta co apoio da Consellería de Cultura, Educación e Ordenación Universitaria e Facultade de Filosofía da USC 

OLIMPÍADA FILOSÓFICA DE GALICIA